به گزارش خبرنگار سایت افغانستان خبرگزاری فارس، «عبدالله عبدالله»، رییس شورای مصالحۀ ملی در سفر به تاجیکستان، با «محمدطاهر ذاکرزاده»، رییس مجلس نمایندگان این کشور، دیدار و گفتگو کرد.
ذاکرزاده در ابتدای این دیدار ورود هیأت عالى‌رتبه افغانستان به این کشور را خیر مقدم گفت و حمایت مجلس نمایندگان و کشورش از تلاش‌های صلح در افغانستان را اعلام کرد.
رئیس پارلمان تاجیکستان، صلح و ثبات در افغانستان را به نفع صلح، ثبات، ترقی و توسعه در منطقه خواند و ابراز امیدواری کرد تلاش‌های صلح در این زمینه به نتیجه ای مطلوب برسد.
رئیس مجلس نمایندگان تاجیکستان، صلح در افغانستان را به معنای صلح و ثبات در تاجیکستان و منطقه خواند و از حمایت همه جانبه «دوشنبه» از تلاش‌های صلح اطمینان داد.
وی همچنان ابراز امیدواری کرد روابط پارلمانی میان دو کشور افزایش یابد.
عبدالله نیز به نوبه خود ضمن تشکر از دعوت تاجیکستان و سپاسگزاری از حمایت‌های رئیس جمهور و مردم این کشور از تلاش‌های صلح و مردم افغانستان، روابط میان دو کشور را استوار بر ارزش‌های دیرینه تاریخی- فرهنگی خواند.
طی ملاقات در مورد تلاش‌های صلح، مذاکره با طالبان، نقش کشورهای منطقه در تأمین صلح، سفرهای منطقه‌ای برای کسب اجماع منطقه‌ای در حمایت از صلح و نقش تاجیکستان در تأمین صلح در افغانستان به تفصیل بحث و تبادل نظر صورت گرفت.
خاطر نشان شد که تاجیکستان تجربه خوبی در ختم جنگ داخلی و دست‌یافتن به صلح و رفاه دارد و می‌تواند افغانستان را در این راستا کمک نماید.
صبح امروز عبدالله عبدالله، رییس شورای عالی مصالحه‌ی ملی در ادامه‌ی سفرهای منطقه‌ای خود به تاجیکستان سفر کرده است، عبدالله را در این سفر یک هیأت بلندپایه دولتی همراهی می‌کند.
عبدالله برای جلب حمایت از تلاش‌های صلح و تقویت اجماع منطقه‌ای در حمایت از صلح به دعوت رسمی تاجیکستان، عازم شهر دوشنبه، پایتخت آن کشور شده است.
عبدالله در جریان این سفر قرار است با امام‌علی رحمان رییس‌جمهور، قاهر رسول‌زاده نخست‌وزیر، محمدطاهر ذاکرزاده رییس مجلس نمایندگان و سراج‌الدین مهرالدین وزیر خارجه‌ی جمهوری تاجیکستان دیدار کند.
انتهای پیام/ ر
